Mahatakatra ny atao hoe herisetra ao an-tokantrano

• Hatramin’izay niarahako taminy dia mahatsapa ho tsy matoky tena intsony aho.
• Mahatsapa ho mitandrina be foana aho.
• Matahotra aho indraindray sao handratra ny zanako izy.
• Matahotra azy aho indraindray.
• Tsapako fa kely ny fizakan-tenako amin'ny fiainako.
• Tsy afaka mitony tanteraka aho rehefa miaraka aminy.
• Sahiran-tsaina aho rehefa mandray antso an-tariby na hafatra avy aminy.
• Indraindray aho matahotra ny hody.
• Tsapako ho mitebiteby aho rehefa mody izy.
• Tsapako ho nampanalavirina ny fianakaviako sy ny namako aho hatramin'izay niarahanay.
• Mahatsiaro ho manirery aho.
• Miaina ao anatin'ny rivo-piainana feno tahotra sy fitaintainana aho.
• Tsapako ho tsy afaka matoky ny fahitako ny zava-misy aho.
• Hatramin'izay niarahako taminy dia mahatsiaro ho vendrana, ratsy tarehy ary tsy misy ilana ahy aho.
• Indraindray dia miala tsiny aho amin‘ny farany na asainy miala tsiny amin‘ny fihetsiko, na dia tsy mihevitra aza aho fa misy zavatra tsy mety nataoko.
• Tsapako fa tsy asiany lanja ny maha-ray aman-dreny ahy.
• Matetika aho no manao fialan-tsiny amin'ny fitondran-tenany. Niainaa zava-tsarotra izay mahatonga azy hanao fihetsika mifehifehy, manjakazaka sy/na mahery setra.
• Menatra hiresaka amin'ny olona akaiky ahy momba ny toe-javatra misy aho.

Raha toa ka mifanaraka amin'ny zavatra tsapanao ny iray amin'ireo fanambarana ireo farafahakeliny, dia mety miaina endrika herisetra ao an-tokantrano iray na maromaro ataon‘ny vadinao ianao.

Ny herisetra ara-tsaina dia mety hiseho amin‘ireto endrika manaraka ireto:

• manara-maso ny fihetsikao, ny zavatra ataonao, ny mailaka azonao, ny antso voarainao sy/na ny fandaharam-potoanao
• mampanalavitra anao na manakana anao tsy hihaona amin'ny olona akaiky anao (namana, fianakaviana)
• manao chantage ara-pihetseham-po aminao 
• tsy manisy lanja sy/na manala baraka anao
• mampihorohoro sy/na mandrahona anao 
• mampijaly anao
• tsy manisy lanja ny maha-ray aman-dreny anao
• milaza na milaza an-kolaka fa diso na ambany noho ny azy ny kolontsainao, ny fivavahanao na ireo safidy ataonao
• "mampivilivily" ny sainao, izay midika hoe mamafy fisalasalana ao anatinao mikasika ny fitadidianao, ny fahitanao ny zava-misy sy ny fahasalamanao ara-tsaina amin'ny alàlan'ny fanazavana vilana na ny fanafenan-javatra aminao.

Raha miverimberina izany dia herisetra ara-tsaina eo anatin‘ny fiarahana.

Efa niainanao ka azonao ve ireto fanambarana ireto?

• Milaza amiko izy fa tsy mety avokoa izay ataoko rehetra.
• Anaovany chantage ara-pihetseham-po aho amin‘ny filazany amiko hoe raha tena tia azy aho dia hanao izay tiany.
• Mandrahona ny hanisy ratsy ny zanako na ny biby fiompiko izy, na hanala ireo amiko.
• Milaza izy fa tsy misy afaka mitia ahy afa-tsy izy ihany.
• Nosakanany tsy hitsidika ny namako na fianakaviako aho. 
• Afaka ny ho faran‘izay saro-piaro izy raha mandany fotoana lavitra azy aho na raha mifandray amin'olon-kafa.
• Manara-maso ny fandaharam-potoanako izy. Tiany ho fantatra foana hoe aiza aho ary miaraka amin’iza.
• Rehefa mitaraina ny amin‘ny fihetsiny aho dia lazainy fa fahadisoako izany. 
• Tsy miraharaha ahy izy rehefa miteny aho, tahaka ny hoe tsy ao amin’ilay efitrano aho.
• Notereny hanao zavatra tsy dia tiako hatao loatra aho.
• Tereny handray anjara amin'ny zavatra tsy ara-dalàna aho.
• Mandrahona ahy am-bava, amin-javatra na amina fihetsika mandrahona izay mahatonga ahy hieritreritra fa handratra ahy izy. 

Raha toa ka mifanaraka amin'ny fihetsiny ny iray amin'ireo fanambarana ireo farafahakeliny, dia mety miaina endrika herisetra ao an-tokantrano iray na maromaro ianao.

Ny herisetra am-bava dia mety hiseho amin‘ireto endrika manaraka ireto:

• mibaiko anao
• mivazavaza aminao
• manompa anao
• mandrahona anao na ny zanakao.

Efa niainanao ka azonao ve ireto fanambarana ireto?

• Milaza amiko izy fa ratsy tarehy na maloto aho.
• Milaza amiko izy fa ratsy ny feoko na ny fomba fiteniko.
• Manambany na manompa ahy amin'ny takona na eo imason’olona izy.
• Mivazavaza amiko izy.

Raha toa ka mifanaraka amin'ny fihetsiny ny iray amin'ireo fanambarana ireo farafahakeliny, dia mety miaina endrika herisetra ao an-tokantrano iray na maromaro ianao.

Ny herisetra ara-bola dia mety hiseho amin‘ireto endrika manaraka ireto:

• manala ny fidiram-bolanao
• manara-maso ny volanao sy ny fandanianao
• managia ireo fomba fandoavam-bolanao
• manakana anao tsy hiasa na mandresy lahatra anao hampihena ny ora iasanao.

Efa niainanao ka azonao ve ireto fanambarana ireto?

• Sakanany tsy handray fanapahan-kevitra aho, indrindra fa momba ny asa na fianarana.
• Sakanany tsy hiasa, hiofana na handeha fitateram-bahoaka aho.
• Sakanany tsy hianatra teny frantsay aho.
• Manara-maso ny fandaniam-bolako sy/na mihazona ny carte bancaire-ko sy ny taratasim-bolako izy.
• Tsy avelany mampiasa vola hividianako izay ilaiko aho. Tsy mahavidy ireo zavatra fototra ilaiko ny vola avelany ampiasaiko.
• Ametrahany fepetra ny fahafahako mampiasa vola. Ohatra, raha mahatezitra azy aho dia sakanany tsy mahazo mampiasa vola.

Raha toa ka mifanaraka amin'ny fihetsiny ny iray amin'ireo fanambarana ireo farafahakeliny, dia mety miaina endrika herisetra ao an-tokantrano iray na maromaro ianao.

Rehefa misy ankizy tafiditra dia mikasika azy ireo ny ankamaroan'ny herisetra ao an-tokantrano. Ny herisetra mifandraika amin'ny fitaizana dia mety hiseho amin‘ireto endrika manaraka ireto:

• Manakiana na tsy manisy lanja ny maha-ray aman-dreny anao.
• Manakana anao tsy hitaiza ny zanakao.
• Manakana anao tsy hiditra an-tsehatra hiaro ny zanakao.
• Manao fihetsika mampidi-doza sy mampatahotra ny zanakao.

Efa niainanao ka azonao ve ireto fanambarana ireto?

• Angatahany ianao tsy hikarakara ny zanakao mba hikarakarana azy.
• Izy no manapa-kevitra amin'izay azonao atao sy tsy azonao atao amin'ny zanakao.
• Mandray ny fanapahan-kevitra lehibe rehetra momba ny zanakao izy: ny fianarany, ny fahasalamany, sns.
• Kianiny ny fomba fitaizanao ny zanakao.
• Lazainy amin’ny zanakao fa olon-dratsy ianao.
• Raràny tsy mahazo mandeha mivoaka miaraka amin'ny zanakao ianao raha tsy miera aminy.
• Izy no manapa-kevitra mikasika ny fotoana ahafahan'ny zanakao mitsidika ny fianakavianao.
• Mandrahona anao izy fa hotazominy ny zanakao raha miala aminy ianao.
• Raha manana fahasembanana ianao dia tsy asiany lanja ny maha-ray aman-dreny anao noho izany.

Raha toa ka mifanaraka amin'ny fihetsiny ny iray amin'ireo fanambarana ireo farafahakeliny, dia mety miaina endrika herisetra ao an-tokantrano iray na maromaro ianao.

Ny herisetra mifandraika amin'ny antontan-taratasy dia mety hiseho amin‘ireto endrika manaraka ireto:

• fanagiazana na fametrahana fepetra amin'ny fahafahanao mampiasa ny antontan-taratasinao: kara-panondro, pasipaoro, taratasy fahazoan-dalana hipetraka, kara-pahasalamana na "carte vitale", bokim-pianakaviana na "livret de famille", boky firaketana ara-pahasalamana na "carnet de santé", diplaoma, filazana hetra, sns.
• mandrahona ny hanao tatitra momba anao mba ho voaroaka avy ao Frantsa ianao
• mijery ny soratra fifandraisanao amin‘olona: taratasy, mailaka, hafatra an-tsoratra, sns.

Efa niainanao ka azonao ve ireto fanambarana ireto?

• Hazoniny any aminy ny antontan-taratasy momba ahy.
• Hazoniny any aminy ny taratasy momba ny zanakay izy.
• Vakiny ny taratasy alefan'olona amiko.
• Mampitandrina ahy izy fa ho voaroaka avy aty Frantsa aho raha miala aminy.
• Mandrahona ny handao ahy izy ka ho very ny zoko honina aty Frantsa.
• Izy no mifehy ny raharaha ara-panjakana rehetra momba ahy, na dia te hahaleo tena aza aho.

Raha toa ka mifanaraka amin'ny fihetsiny ny iray amin'ireo fanambarana ireo farafahakeliny, dia mety miaina endrika herisetra ao an-tokantrano iray na maromaro ianao.

Ny herisetra ara-batana sy ara-pitaovana dia mety hiseho amin‘ireto endrika manaraka ireto:

• manary na manimba zavatra
• manozongozona anao
• mamely anao, amin-javatra na tsia
• manaikitra anao
• mandoro anao
• manakenda anao
• manosika anao 
• mifehy anao sy manakana anao tsy hihetsika malalaka
• manidy anao

Efa niainanao ka azonao ve ireto fanambarana ireto?

• Lasa mahery setra izy indraindray: mahavita manimba zavatra.
• Nanao fihetsika feno herisetra ara-batana tamiko izy: nandratra ny vatako izy.
• Lasa mahery setra izy indraindray, fa avy eo izy miteny hoe azafady ary mampanantena fa tsy hanao izany intsony.
• Manery ahy hifoka zava-mahadomelina na hisotro toaka izy.
• Niezaka nisakana ahy tsy hihinana fanafody na hanatona dokotera izy tamin'ny fotoana nilako izany.

Raha toa ka mifanaraka amin'ny fihetsiny ny iray amin'ireo fanambarana ireo farafahakeliny, dia mety miaina endrika herisetra ao an-tokantrano iray na maromaro ianao.

Ny herisetra ara-nofo dia mety hiseho amin‘ireto endrika manaraka ireto:

• manorisory anao ara-nofo, izany hoe miresaka aminao imbetsaka amina fiteny na fihetsika mifototra amin'ny maha-lehilahy sy ny maha-vehivavy na vetaveta
• manery anao hanaovany karazam-panao ara-nofo
• manery anao hanao firaisana ara-nofo
• manery anao hanao firaisana amin'olon-kafa ho takalom-bola.

Efa niainanao ka azonao ve ireto fanambarana ireto?

• Manery ahy hanao fihetsika ara-nofo tsy tiako izy.
• Manery ahy hanao firaisana ara-nofo izy amin'ny fotoana tsy aniriako izany.

Raha toa ka mifanaraka amin'ny fihetsiny ny iray amin'ireo fanambarana ireo farafahakeliny, dia mety miaina endrika herisetra ao an-tokantrano iray na maromaro ianao.

Ny herisetra an-tserasera dia mety hiseho amin‘ireto endrika manaraka ireto:

• manara-maso ny zavatra ataonao sy ny fifandraisanao amin'ny fitaovana nomerika: telefaonina, ordinatera, sns. 
• manorisory anao amin'ny alalana hafatra an-tsoratra, antso na tambajotra sosialy. 
• mandrahona ny hanaparitaka vaovao, sary na horonantsary momba anao amin'ny aterineto.

Efa niainanao ka azonao ve ireto fanambarana ireto?

• Manorisory ahy amina hafatra an-tsoratra, antso na hafatra an-tserasera izy.
• Jereny ny findaiko, ny solosaiko ary ny tambajotra sosialiko. 
• Mandrahona ny hanaparitaka mombamomba ahy manokana izy.
• Izy no milaza amiko izay tokony havoakako amin'ny tambajotra sosialy.

Raha toa ka mifanaraka amin'ny fihetsiny ny iray amin'ireo fanambarana ireo farafahakeliny, dia mety miaina endrika herisetra ao an-tokantrano iray na maromaro ianao.

Zava-dehibe ny manavaka ny fifandirana sy ny herisetra ao an-tokantrano:

• Ny fifandirana dia zavatra ara-dalàna ao anatin'ny fiarahana. Ny anton‘izany dia tsy mitovy hevitra foana akory ny mpivady amin‘ny zavatra sasany. Na izany aza, rehefa mitranga izany, dia afaka manome ny heviny ny tsirairay ary mifototra amin'ny marimaritra iraisana ny fanapahan-kevitra raisina. Fifandraisana miralenta izany.
• Ny famantarana ny herisetra ao an-tokantrano dia ny fanjakazakan'ny andaniny amin'ny ankilany. Tsy anatina fifandraisana miralenta ny mpivady. Mampihatra fahefana amin‘ny iray ny anankiray mba hanjakazakana, hifehezana ary hamoronana fiankinan-doha aminy.
• Raha toa ka, rehefa mifamaly ianareo, ka mampiseho ny iray amin'ireo fihetsika feno herisetra ireo ny vadinao, dia tsy fifamaliana ara-dalàna intsony izany fa herisetra ao an-tokantrano.

Raha manao fihetsika toy izany matetitetika ny vadinao, na dia tsy eo am-pifamaliana aza ianareo, dia herisetra ao an-tokantrano izany.

Ny vady mpanao herisetra matetika dia mahazo fahefana amin'ny alalan‘ny fandraisana anjara betsaka ao anatin'ny fiarahana. Matetika no olona mpanodinkodina izay mahavita mamitaka ny manodidina azy.

Mahay maneho ny tenany toy ny vady tonga lafatra izy: 

• mihaino tsara ary manampy be dia be ny vadiny izy ny fahitana azy
• mahavita mifantoka be aminy izy 
• manambara fitiavana ao anatina fotoana fohy izy. 

Tetika hifehezana avokoa ireo ny tena marina. Avy eo izy dia mahavita mampitoka-monina ilay vadiny izy, ka mahatonga azy hisalasala ary tsy hatoky tena. Lasa miankin-doha tanteraka aminy ilay vadiny avy eo.

Tsy fahadisoanao mihitsy raha manao ny iray amin'ireo karazana herisetra ireo izy. Tsy misy fanamarinana na fialan-tsiny amin'ny herisetra.

Ivelan‘ny fifandraisana o amin‘ny mpivady dia matetika no mahasarika, malala-tànana ary manaja no ahitana ireo mpanao herisetra ao an-tokantrano. Saingy tsy maneho izany hoe iza marina izy ireo ao anatina fifandraisana ara-panambadiana. Manodinkodina ny olona manodidina azy izy ary tena havanana amin‘ny fanaovana izany.

Tsy fahadisoanao mihitsy izany. 

Fahita matetika ny vehivavy tafaraka amina vady mpanao herisetra mihoatra ny indray mandeha. 

Tena maro tokoa ny herisetra ataon'ny lehilahy eo amin'ny fiarahamonina misy antsika, hany ka iray amin‘ny vehivavy telo no miatrika herisetra ao an-tokantrano mandritra ny androm-piainany. Midika izany fa maro ny lehilahy manao herisetra ao an-tokantrano mandritra ny fiainany.

Indrisy anefa, tsy azo inoana fa efa niova ny vadinao.

Ny herisetra ao an-tokantrano dia matetika miseho amin'ny alalana tsingerina misy dingana efatra mifandimby amina hafainganam-pandeha miovaova ka ny tsirairay amin‘ireo dia mampitombo ny fanjakazakana amin'ilay vady iharan'ny herisetra:

Fihenjanana

• Miha tsy manam-paharetana, tsy mandefitra ary/na mahery setra ny vadinao.
• Izany dia miteraka fihenjanana sy tahotra ao anatin'ny fifandraisana.
• Manahy ny hipoahan‘ny herisetra ianao ka miezaka manome izay ilainy.
• Mitandrina izay ataonao sy lazainao ianao.

Fitrangana herisetra

• Mitaky ny hanekenao ny fahefany sy ny fifehezany anao ny vadinao.
• Mifehy, manimba ary/na manetry anao izy.
• Mampiasa paikady fiarovana samihafa ianao.

Fanamarinan-tena

• Mampiasa antony mba hanamarinany ny herisetra ataony ny vadinao.
• Miezaka manao izay hinoanao izy fa ara-dalàna ny fihetsiny.
• Mety hanamaivana ny maha-gravy ny zavatra nitranga izy.
• Miezaka ny mankatra ny antony anaovany izany ianao, ary mety hihevitra mihitsy aza amin‘ny farany fa fahadisoanao izany.
• Mihevitra ianao fa raha manova ny fomba isahananao zavatra ianao dia tsy hitranga intsony izany.

Fitoniana

• Te hihazona ny fifandraisana sy hamerina ny fahatokisanao azy ny vadinao.
• Mihena na manjavona ny herisetra.
• Mihaino anao tsara izy ka manao izay hahatsapanao fa manao ezaka izy.
• Mety ho marefo no fahitana azy.
• Toa tsapanao fa hitanao indray ilay olona nahalatsa-pitiavana anao taloha.
• Mety hampihena ny zavatra andrasanao amin'ny vadinao ianao amin‘ny farany ary hanova ny fahazaranao mihitsy aza satria manantena ianao fa hitohy io vanim-potoana io na hiova ny vadinao.

Arakaraka ny iverimberenan'ireo tsingerina ireo no mahatonga ireo vanim-potoana ireo hatetika kokoa, ary lasa mahalana ny fotoanan'ny fitoniana. 

Hitombo tsikelikely ny fandeferanao, ary mety hisakana anao tsy hahita ny herisetra izay efa lasa isan'andro izany.  

Tsy tompon'andraikitra ianao. Na ahoana na ahoana fanamarinany izany dia ny vadinao na vadinao taloha irery ihany no tompon'andraikitra amin'ny herisetra ataony aminao. 

Tsy ara-dalàna ny fihetsiny ary azon'ny lalàna sazina. 

Indrisy anefa fa tena mateti-pitranga ny herisetra ao an-tokantrano. Iray amin’ny vehivavy telo no hiaina endrika iray amin‘ny herisetra ataon'ny lehilahy farafahakeliny mandritra ny androm-piainany.